Moy wonete Pullo gooŋga?

To a ƴami yimɓe “Moy wonete Pullo gooŋga?” a heɓan jaawaabuuji feere feere.  Woɗɓe mbi’an Pullo gooŋga mo Pullo maama joweeɗiɗi, jillel walaa.  Woɗɓe mbi’an mo mari pulaaku, cuusal e munyal.  Pullo gooŋga sey ɗum tawra mo pulaaku, semteende.  O huuwataa ko semtinta hoore maako.  O huuwataa ko semtinta lenyol maako.  Woɗɓe mbi’an sey o julɗo, o marɗo na’i, o egga.  Yimɓe ngoodi numooji feere feere dow Pullo gooŋga.  Ɓe ɗon mbolwa dow ko ɓe ndaarata malla ko yimɓe anndini ɓe.  To en mbaawi ƴamgo Allah ƴamol man ɗume o jaabata?  Teema o jaaban bee ƴamol.  O ƴaman “Ngam ɗume mi tagi Pullo?”  Ɗume jaawaabu ƴamol ngol?  Wolde Allah ɗon holla en no “Allah tagi neɗɗo dow jaati muuɗum, o tagi mo dow nanndal maako, o tagi gorko e debbo.”  Allah tagi nafsu neɗɗo dow jaati mum.  Allah tagi neɗɗo bee anndal ngam haa o annda Allah. Allah tagi neɗɗo bee ɓernde ngam o yiɗira Allah.  Allah tagi neɗɗo bee raayu ndimu ngam o ɗowtano mo.  Pullo ɗon dow lesdi ngam Allah, o yeeɗaay ngam hoore maako.  Allah tagi Pullo bee baawɗe anndugo mo, yiɗugo mo e ɗowtanaago mo haa foroy!  Moy wonete Pullo gooŋga mo Allah yerdi?  Naa ɗum lenyol!  Naa ɗum pulaaku!  Ɗum Pullo mo mari kawtal bee Allah, giɗɗo mo, ɗowtantooɗo mo.  Ɗum Pullo mo anndi Wolde Allah ngam haa o ɗowtano mo.  Nyande feere goɗɗo ƴami Annabi Iisa Almasiihu “umroore Allah ndeye ɓuri mawnugo?”  Annabi Iisa Almasiihu jaabi “Yiɗ Jawmiraawo, Allah maaɗa bee ɓernde ma fuu, bee yoŋki ma fuu, bee semmbe ma fuu,  bee hakkiilo ma fuu, non boo yiɗ keeddiɗɗiraawo ma bana no a yiɗiri hoore ma.  Walaa umroore feere ɓuri ɗe’e.”

 

 

---